Yazıcı ve dramaturg Yusuf Bolat 1909 senesi Aluşta şeerinde fuqare qorantasında doğdı. 1935 senesi o Qırım pedagogika institutının qırımtatar tili ve edebiyat bolügini bitirdi.

Şu devirden başlap Yusuf Bolat gazeta ve jurnallar muarriyetlerinde edebiy hadim olaraq çalışa. Onın edebiy yaratıcılığı 30-cı seneleri başlay. Vetan cenkinden evel o bir sıra pyesalar yaza:’’Deniz dalğasız olmaz’’,’’Sonki gece ‘’. Bu devirde yazılğan eserlerden en meraqlı ve qıymetlisi ‘’Alim’’romanıdır. Romanın baş qaramanı halqımıznın sevimli batırı efsaneviy Alimdir. Birinci qısımda Alimnin balalığı, qorantalarının taqdiri, koylülernin ağır vaziyeti tasvirlene. Roman vesiqalar ve halq tarafından yaratılğan yır, rivayetlerge esaslanıp yazılğan.
    Cenkten sonki devirde Yusuf Bolat Uzbekistanda yaşay. Çoq yıllar devamında ‘’Lenin bayrağı’’ gazetasında baş muarrir muavini olıp çalışa . O ‘’Saf yurekler’’, ‘’Anife’’ romanlarını ve bir sıra ikayeler yazdı. Uçunci sınıf içün  ‘’Ana tili’’ dersliginin muelliflerinden biri Yusuf Bolattır.
     1969 senesi doğğanına 60 yıl toluvı munasibetinen Yusuf Bolatqa ‘’Uzbekistan SSRde nam qazanğan medeniyet hadimi’’ unvanı berildi. Sonki yıolları o Alim romanının devamı ustünde çalışa ve onın ekinci qısmını yazdı. Yazıcı Alimnin  qaramanlıqları , halq oğrunda kureşini, baylarğa , zenginlerge qarşı areketlerini kostere. Yusuf Bolat qırımtatar edebiyatına salmaqlı isse qoştı.